شعری از دكتر حكیمه بلوری(زنگانلی)

یازار : مجید زنگانلی (Məcid Zənganli)

«وطن حسرتی»

دونیادا بئله بیر خسته‌لیك‌ده وار
وطن حسرتیدیر او دردین آدى
ائلیندن٫ یوردوندان آیرى اولانلار
وطنین دردیندن آیرى اولمادى
وطندن اوزاقدا عؤمر ائدنلرین
دردى بؤیوك اولار٫ ائل بیلیر بونو
وطن حسرتینى درك ائدنلرین
گؤزو یولدا قالار عؤمور اوزونو
ائله بیل گونشم٫ بیر اولدوزام من
داغلارین دالیندا باتیب قالمیشام
اینتیظار چكه‌رك گئجه صوبحه جن
سحر اولدوزونو یولا سالمیشام
وطنین حسرتى ایللردیر٬ ایللر
قلبیمى چولقامیش بیر هاله كیمى
گؤزلریم یول چكر هر آخشام سحر
دولاراق بوشالیر پیاله كیمى
منیم خسته لیگیم سؤیله اى حكیم!
"وطن حسرتى"یندن اؤزگه نه اولار؟
بو دؤزولمز دردى، نئجه من چكیم؟
ریشه سیز، ان گوجلو آغاج دا سولار!