تورك

یازار : مجید زنگانلی (Məcid Zənganli)

دؤیوش گونو سوار اولسا آتا تورك

آلقیش دییه ر تورك اوغلونا آتا تورك

داغ دره ده یئل توزونا چاتامماز

اگر آتی بئلی اوسته یاتا تورك

باشدان آیاغ شرف غیرت كاریدی

كیم گؤروپدو اؤز ائلینی ساتا تورك

گؤرسه یوردون اجنبی لر الینده

مومكون دییل بیر گئجه ده یاتا تورك

توتوپ بوغار قایناغیندا قورد كیمی

قوی دوشمن گیرمیش اولسا باغا تورك

بیر قانینان دوخسان دوققوز قان ائده ر

قویماز بیر داملا قانی باتا تورك

مومكون دییل مردین بیر تك توكونی

یوز نامردین چؤره گینه ساتا تورك

عهدیم بودور هامی وئره ال اله

جانی جانا مالی مالا قاتا تورك

داغدا اجنبی ده ده قورقود عشقینه

مومكون دییل میللیتین ساتا تورك